محــــــــــــــــــــــــــــــــلك سر
بعد كل التعب و الهتاف اصبح كل شئ محلك سر و ما فيش اى حاجة حصلت عشان نقول احنا حاسين بفرق .. هو الثورة اتعملت عشان احمد عز و عادلى و جرانة و مغربى و جمال و علاء و مبارك و زكريا عزمى و نظيف و بــــــس ؟ ولا كان ليها هدف تانى المفروض ان كان الشعار بتاعنا (عيش , حرية , عدالة اجتماعية ) !
للأسف لا شئ من مطالب الثورة الاساسية تحقق او يتحقق .. نحن محلك سر لا نتقدم خطوة للأمام , حتى و لو تقدمنا خطوة بتكون نتائجها غريبة
الشعب رشح الاخوان
هايل طب الأخوان فين من الازمات و القرف اللى موجود ؟ خلاص الفكرة كلها اصبحت ان الاخوان جالسين على مقاعد مجلس الشعب و بس ؟ فين الحلول المقدمة ؟ فين العين الحمرا اللى احنا كنا منتظرينها ؟ فين كل الكلام دا ..؟ عاوزين شرعية اية تانى عشان تتحركوا ؟
حق الشهداء فين ؟
هل يعقل ان نائبة محترمة تقول كل ما نسأل على شهيد يطلع عليه احكام ؟ يعنى كل الشهداء اللى انت شايفهاهم بلطجية ؟ طب ما انت كانت عنيكى بتسح دموع لما اكرم الشاعر اتكلم على ابنة .؟
فين العيش ؟
و الله لحد دلوقتى الناس تعبانة و متبهدله .. و يوم ما يكون الدقيق موجود مافيش سولار او غاز عشان نخبز .. يبقى فين العيش ؟ بلاش كلمة عيش بمعنى خبز و نخليها العيش
العيش اللى كل شاب بيتمناة انة يعيش فى بلدة ؟
فين الحرية ؟
هو انت فاكر ان الحرية دى حاجة وحشة ؟ الحرية دى يا محترم حاجة جميلة جدا بس اشعر بيها الاول و انت تعرف ان دا شئ رائع ... لما تحس بالحرية فى بلدك ابقى كلمنى
فين العدالة الاجتماعية ؟
اكيد كل الكلام دا مش موجود فى وقتنا الحالى لو استمرينا بالوضع دا هانفضل زى ما احنا .. محلك سر
ليست هناك تعليقات:
إرسال تعليق