إغسلها كويس

لفظ بنسمعه كتير فى الحوارى و الشوارع

  قصدك اية بأغسلها كويس ؟ ..مش قصدى حاجة غير كل خير ...احنا لية بنحس ان دى شتيمة او  إهانة ؟..على الرغم انها ممكن تكون مبادرة للنظافة, او الضمير فى غسل الشئ كويس ...لازم تاخد بالك من الراجل اللى بيقولك اغسلها كويس ..ما انا ممكن اغسل عربيتى فى مكان و اقولة اغسلها كويس .. قصدى على العربية

ممكن اقول للمغسلة اغسلها كويس ...قصدى على الهدوم يعنى مادايقش نفسك ممكن يكون قصدى على كوباية الشاى انك تغسلها كويس ..ممكن الام تقول لأبنها اغسلها كويس و تقصد ايدة بعد اللعب فى الشارع ...انا شايف اغسلها كويس دى ماتزعلش حد .. وعشان كدا بقول لك اغسلها كويس ... اقصد دماغك ... غسلها كويس بالعلم و المعرفة عشان تبقى دماغك نضيفة ما فيهاش جهل . و بالنسبة  لحاجات كتير عاوز اوجة اغسلها كويس لكل واحد فى مصــــــــر انه يغسلها كويس اوى اوى اوى .....

يا شرف اغسلها كويس ......اقصد الوزارة

يا عسوى اغسلها كويس ...اقصد الداخلية

يا شرطة اغسليها كويس .... اقصد الحكومة

يا مجلس يا عسكرى  اغسلها كويس اوى اوى اوى ..... اقصد مصر

فية واحد عاوز اقولة اغسلها كويس وربنا اعلم بالنية 

مبارك اغسلها اكويس.................(.................) !!!!!

و احب اقول لكل واحد من اللى بيقرأ المدونة دى انه لازم تغسلوا كويس ...... اقصد ضميرك

بعد اذنكم عشان اروح اغسلها كويس

 .... شربــــــــــــــــــاتى

مؤذن فى مالطا

مدام مافيش حد فينا بيعرف يألف كويس فلازم نكون بنعرف نقرأ قبل ما نألف عشان مايبقاش فى فتاوى ليس لها اى مصدر من الصحة . مش عاوزين ندخل نفسنا فى دومات احنا مش قدها خاصة ان الدنيا مش ناقصة فتاوى و كلام فارغ , كل مرة بفتكر يوم الدفاع الشعبى اللى كلنا كنا واقفين تحت بيوتنا بنحرسها و وتلاقى حبة عيال وسخة راكبين متوسكلات يقعدوا يقولوا البلطجية جايين منها ,, لأ دول جايين من هناك ..فى الاخر تكتشف ان لا فى هنا ولا هناك و كلها ناس بتفتى فى اى كلام فى رغيف و خلاص ..عزيزى قارى هذة المدونة او ماقرتهاش ما تخليش حد يفتى بقى .. احنا اللى مضيعنا الفتاوى و الكلام الاهبل و ماسكين فى البردعة و سايبين الحمار ..طب ماهو الحمار اهم من البردعة . إلا إذا كان البردعه ذهب .. خلاص كل واحد عامل فيها فيلسوف و شايف مصر من وجهه نظره هو و مضيع الدنيا ... يقولك البلد كلها زبالة و هو اول واحد بيرمى زبالته فى الشارع ..طب و أخرتها ايه ؟ سبحان الله  ....لما ربنا سبحانه وتعالى وزع الرزق كل واحد مارضيش برزقة ..لكن العقل كل واحد مريحوا عقله وهو اللى عاوز يمشى ... خلاص كلنا بقينا رؤساء و بقينا قاده ولازم الناس تسمع كلامنا .. طب لما فية واحد بيضرب لازم واحد ينضرب مش كل مرة تتخانق لازم هاتضرب فيها .. اكيد هايجى يوم وتنضرب علقة بنت كلب و ساعتها تعرف ان الله حق ....

اتعلمت فى الكلية ان القائد الناجح لازم يكون فى الاول تابع ناجح ..ماينفعش انك تكون قائد غير لما تكون تابع و تابع كويس مش اى هبل وخلاص ...عشان تقول أوامر لازم تكون نفذت اوامر عشان تعرف هل فية ضغوط على اللى هاينفذ الاوامر دى ولا لأ ....هل الراجل اللى انت بعطى له الامر دا راجل على اد المسؤلية ولا هايغرقك ... اصل البلد مش عاملة زى واحدة انت متجوزها و عاوز كلامك يمشى عليها و خلاص ..دى بلد يعنى مكونة من عائلات كتير و كل عيلة ليها مسؤليات ...انت فاهمنى ولا عمال اتكلم وخلاص ؟؟

المهم يا اصدقائى دا لو حد بيقرأ من اساسة  المدونة دى اعرف ان الله بصير بالعباد ولازم تعرف انك مسئول على قدك لحد ما تمسك مسئولية اكبر ..ارضى بنصيبك و ماتبصش لغيرك بقى ...

يا سلام ... البلد عدى عليها سنة من غير رئيس ... حلو اوى .. انا ماحستش بأى حاجة ..بس بتمنى ان ما يبقاش فية سرقة ...انا ماقصدش على الحرامية الغلابة ...انا اقصد على الحرامية اللى زى احمد عز و غالى و نظيف و رشيد و سالم و.......... قول للصبح ...

حد فاهم حاجة .... 

اعمل عبيط

اللى يفتكر العنوان دا يفتكر كتاب جمال الشاعر الهايل اللى كان فى الاسواق بس للأسف احنا بقينا دلوقتى نعمل عبط فى مواقف كتير و مش دا معدن المصرى اللى احنا متعودين علية ... رشوة واعمل عبيط .. اى غلط ..اعمل عبيط....يا جماعة عنصر الرقابة لازم يكون موجود و عشان البلد لسة ما وقفتش على حيلها فلازم كل واحد يكون رقيب نفسة ... لازم تكون رقيب على التصرفات بتاعتك عشان انت دلوقتى القدوة و المنظر اللى بيشوفة الأطفال ...الاطفال يا جماعة اللى لازم مانستهونش بيهم ..الاطفال ناقوس اما ان يكون خطر اما ان يكون خير يملىء البلاد اطفال مصر اهم العناصر الان .. و اللى فى مدارس الحكومة اهم من المدارس الخاصة ... مش عوزك تعمل عبيط فى كل حاجة ... فية حاجات كتير مش مستاهلة انك تعمل عبيط فيها ... انا ماقلتش انك تعمل بطل ... بس على الاقل لازم يكون فية وعى و الوعى دا اهم حاجة فى بناء الدولة الجديدة ..و اوعة وإياك فى يوم او ساعة تعمل فيها عبيط أو عابر سبيل مش من البلد .....كلنا عنصر مهم جدا فى بناء البلد دى .. و ياريت تنسى كلمة اعمل عبيط 

صارم: قلب العالم

صارم: قلب العالم: السلام عليكم ورحمة الله و بركاته لو شبهنا العالم بأنه الجسد , هانقول ان مصرهى القلب, لو شفت الخريطة كويس, هاتعرف موقعها يدل على انها قلب ال...

قلب العالم

السلام عليكم ورحمة الله و بركاته

لو شبهنا العالم بأنه الجسد , هانقول ان مصرهى القلب, لو شفت الخريطة كويس, هاتعرف موقعها يدل على انها قلب العالم و فى حديث لسيدنا محمد صلى الله عليه وسلم

ألا و إن في الجسد مضغة إذا صلحت صلح الجسد كله و إذا فسدت فسد الجسد كله ألا و هي القلب

مصر اللى بارك يسوع لشعبها فى الانجيل اللى بيقراه كل مسيحيين العالم

و سيدنا موسى دعا لمصر فى التوراه اللى بيقرأها كل يهود العالم

هى دى بلدى ....

ان اختلفنا مش مهم ..بس ان احنا نكون مختلفين على طول هى دى المصيبة .. عاوز اقول لكل مسلم مش دين الاسلام اللى قال نضرب المسيحيين , المسيحيين اللى كانوا بيحرسوا المسلمين لحد مايخلصوا صلاه ....حتى لو كنت مش فى الميدان و مارحتش التحرير من اساسة ..ماتنساش انك وانت فى الجان الشعبية كان معاك حد مسيحيى و بتحرسوا المنطقة ... عاوز اقول لكل مسيحى المسلم كان بيحرس الكنيسة معاك , المسلم كان واقف جنبك ... ولما تحصل حرب الرصاصة مش هاتفرق مابين مسلم و مسيحى

بسم الله الرحمن الرحيم

ياأيها الناس إنا خلقناكم من ذكر وأنثى وجعلناكم شعوبا وقبائل لتعارفوا إن أكرمكم عند الله أتقاكم إن الله عليم خبير 

لازم نشتغل ... فية ناس نفسها نفضل فى فوضى و ياريت ما نديهمش الفرصة دى

عاوزين العالم كلة يتصلح ...لازم مصر تتصلح الاول .... و ان شاء الله هايحصل بأدينا كلنا

شكلها من جديد

السلام عليكم و رحمة الله و بركاتة

يا شباب بلاش ننجرف فى دوامة خلقها لينا تخيلات ان مصر عمرها ما هتوصل او هتكون دولة قوية .... لازم نبعد عن اغانى اليأس و الإحباط اللى بتطفى شعلة نورت مصر و عرفت العالم مين هو المصرى لما يغضب ... ارجوكم و بتمنى الكلام اللى اقولة دا مايزعلش منى حد .. لازم نبدأ نبنى مصر .. و عمر مصر ما هتتبنى بمظاهرات و مطالبات و مشاجرات ... عشان البلد تتبنى لازم إيد .. ارجوكم يا اصحاب الايادى أبدأوا ببناء انفسكم قبل ان تبنوا مصر .. لو كل واحد فينا فكر انة يعمل مشروع عشان يكسب منة ,افضل بكتير انه ينام على الرصيف و يعترض .. دا مش معناة ان الاعتراض ممنوع لكن كثرتة بتأثر سلبيا علينا ... اشتغل اى حاجة اعمل اى مشروع .. علم عشر اطفال فى ابتدائى احسن بكتير من انك تقعد على النت عمال بتشتم فى بتوع احنا اسفين يا ريس .. استثمر وقتك ان تقولهم الفضائل المغيبة عن مجتمعنا ,عشان مايطلعوش بالطجية ... علمهم حرفة و نكون زى الصين ... سبحان الله ... مصر فيها موارد كتير و فيها ايد عاملة اكتر . بس لو فضلنا نثور بس مش هانفعنا بحاجة ... البكى و النويح على الميت مش هايصحية تانى ... اللى فات مات ... (بلدك بعد ثورة 25 شكلها من جديد) ...

تحيا مصر