زمن القطط العميا انتهى يا بنى آدمين !!!

عارف لما حد يغمى عنيك و يديلك عصاية و يقولك انت حدودك لحد العصاية و ماتعديهاش ! دا اللى كان بيعملو معانا النظام القديم , شلنا الغماية و العصاية بقى سلاحنا ...يا حكومة عتبروها زى ما أتعتبروها ..مش بعد ما شلنا الغماية عاوزين تحطوها لنا تانى ....

ايوة انا كنت كدا و اكيد ناس كتير كانت كدا , مش احتمال بعيد انت كمان كنت كدا... ايوا انت ..و عشان ناس ضحت بحياتها عشانى و عشانك لازم اولا نترحم عليهم ثانيا نكون على نفس خطاهم و تحقيق حلمهم اللى كانوا نفسهم يشوفوه فى مصر ..انا و انت و كلنا لازم ما نهدأ خالص غير لما مصر تكون احسن و احلى من اى بلد تانية ...بلد لما يتذكر اسمها يقولوا انها اتولدت يوم ما استشهد على ارضها ناس كانت عاوزة العدالة ...و احنا لازم نرفع الراية اللى سابوها لينا اخواتنا اللى استشهدوا و عشان كدا انا ليا عقل و بيقولى هتظاهر , هاسمع الناس صوتى , هاقول انا لسة مش حاسس بأى 
حاجة حصلت و عشان كدا انا هنا و مش لوحدى . معايا كل اخواتى و طيف الشهداء 

مش عاوزين ثورة .. اشربوا بقى !!

لما تيجى تعمل اى مصلحة فى البلد دلوقتى...تعمل باسبور ..رخصة قيادة ..التموين ...حتى طابور العيش ..يقولك مش انتوا عاوزين ثورة .... اشربوا بقى ....
طب انا بقى من بعد ما الثورة بدأت و عمال اشرب ... انا مش فاهم اية معنى اشرب ... لما الناس عملت الثورة كانت عاوزة تعيش عيشة كويسة و تعيشنا كلنا عيشة كويسة و حتى كمان تعيش اللى بيعمل لنا المصلحة عيشة كويسة ....و مش هاخبى عليكم ...لسة فية أكراميات ...لسة فية رشاوى عشان تخلص المصالح....البلد لسة محتاجة كتير ...و لازم نعرف ان ربنا مش بيغير من ناس الا و هما محتاجين التغيير ...نفسنا نكون محتاجين التغيير بجد ..مش ننبح صوتنا وبس , لا احنا محتاجين شغل كتير ... يا جماعة احنا مصريين و المصرى دا لما بيصمم على شئ بيوصل لة ....اتمنى يا شباب يا شبات مايكونش كان امل لينا بس ان مبارك يتخلع عن الحكم و ندخل المفسدين فى السجن ... طب و احنا ؟ مش هانشتغل ؟ ؟؟؟ هانفضل يعنى زى ما احنا نبكى على اللى فات ....... يا جماعة نقطة و من اول السطر بقى ..عشان العيشة تبقى فل و نبقى دولة يتحاكى بيها العالم ....احنا المصريين اللى بنصنع التاريخ ...مافيش صفحة فى التاريخ غير و ذكر فيها اسم مصر سواء ان كان ارضها او شعبها ... حبوا البلد ....لازم نبدأ و نساعد بعض كلنا