صوت هز العالم !!!

شئ اصيل لما تعرف ان شعب مصر كلة بيتجمع عشان يبنى بلدة زى ما هو عاوز بالناس اللى نزلت من بيوتها عشان تقف جنب مصر مش جنب اى شئ تانى .

احساس رائع و انت واقف فى الطابور و شايف كل الاطياف و الاعمار ممكن يكونوا مختلفين فى اللى هيرشحوهم لكن موافقين على شئ واحد و هو انقاذ صوت مصر اللى كان رايح بقالة زمن

غريبة البلد دى و شعبها اغرب .. شعبنا لما شعر بالغيرة من تونس عمل ثورة تحدثت عنها ألسنة العالم بكلمة واحدة و بمعنى واحد ان شعب مصر قادر ان يختار مصيرة بيدة دون ان يغلق صوتة اى دكتاتور

كم انت رائع يا شعب مصر فمصر ليست كما قال هيردوت انها هبة النيل لكنها هبة شعب مصر .. شعب يتعامل مع المشاكل كأنها بسيطة حتى لو كانت مرعبة , شعب يموت و ابتساماتة تملئ الشوارع و الميادين ... الحرية بداخل النفوس .

جيبنات الشعب المصرى غريبة و مرعبة و مخيفة و شجاعة و صارمة ....

اسم مصر أتى من بن سيدنا نوح (مصرايم ) ان كان هذا الكلام صحيح لكن كلمة مصر فى قاموسى اسمها (مصر = اصرار) على تحقيق الهدف .. و المصريون دائما مصرون على تحقيق الهدف

كم انت رائع شعب مصر

للأسف حكام مصر لازم يعرفوا ان حل الازمة ممكن تيجى من المصريين نفسهم

لو عندنا خلل فى الاقتصاد... طب ما تسألوا الفقير اذاى بيدبر حالة لحد اخر الشهر .. اذاى الفقيرة بتقدر تربى ولادها و تدخلهم الجامعة من غير مساعدة حد ؟

لو جبن فى الشرطة .. اسألوا الاطفال الصغيرين بتوع الحوارى اذاى بيرموا نفسهم فى النيل من غير ما يخاف من الغرق

لو عندك خلل فى الهندسة .. اسأل شباب اللى بعملوا بوت فى الصحراء و عايشيين زى الفل

لو عندك خلل فى التكنولوجيا ... اسأل الشباب بتاعت السوفت وير اللى بيصلحوا الحاجات و هما مغمضين عنيهم

لو عندك خلل فى المرور .. اسأل الشباب فى اللجان الشعبية كانوا بيمشوا الشارع إزاى

لو عندك خلل فى الأمن ..اسأل الناس اللى حمت بيوتها من البلطجية .. حموها اذاى

لو عندك .....لو عندك ....لو عندك ....اسأل شباب مصر

يا شباب مصر اصمد ....حتى تصنع مصر كما كانت مصر ايام الفراعنة و ايام الفتح الاسلامى

سيبوكوا بقى من الكباريهات و السكر و العربدة ..

لو عندك خلل فى الحكومة  ................!!!!

خلى شعب مصر يحلها لك يا بـــــــــــــــــــــــيه

شعب مصر ........................................................................ شكرا

حلف العباسية !!!

فية ناس طلعوا مرة واحدة ايام ثورة 25 يناير وقالوا .. احنا ضد العملاء اللى فى التحرير و فى الاخر التحرير هو اللى كسب ... 

ساعتها كان مكانهم فى ماسبيرو 

و مرة تانية طلعوا ناس اسمهم احنا اسفين ياريس عشان الريس مايتحاكمش و فى الاخر بردوا التحرير هو اللى كسب 

و كان ساعتها فى مصطفى محمود 

و مرة تالتة طلعوا لك فى عشان يتضامنوا مع الريس المخلوع فى و مع ذلك كان صوت التحرير القوى 

ساعتها كان فى روكسى 

و مرة رابعة عشان المجلس العسكرى و يتضامنا مع المجهود (العظييييييييم ) اللى بيعملة بصراحة 

المرة دى فى العباسية 

لمل ولخد تفشل المظاهرة بتاعتة  فى (ماسبيرو) و ( مصطفى محمود ) و (روكسى )

يبقى اكيد يعمل الرابعة فى

 مستشفى العباسية 

عباسية عبااااااااااااسية عبااااااااااااااااااااسية

انتفاضة شعب 19 نوفمبر !!!

مش عاوزين نقول على نوفمبر ثورة اكتر ماهى انتفاضة شعب شعر انة بينضحك علية من الواقع الاليم اللى مايتقالش علية غير كدا

الانتفاضة دى ولازم تكون صادق معايا شوية فى الكلام اللى هأقولة فيها بعض النقاط اللى بحللها من وجهه نظرى يمكن تكون صح او غلط بس انا شايف الموضوع دا فى ناس كتير اوى

اولا : فية ناس كتير مانزلتش فى مظاهرات  25 يناير عشان كدا حاسيين انهم ماعملوش انجاز زى الناس اللى باتت فى التحرير ايامها فعشان كدا عندهم شعور قوى جدا انهم لازم ينزلوا المرة دى خاصة ان الموضوع فية افترى زى ماهو ...

ثانيا : معظم الناس اللى بتنزل باتبلغش اهاليها عشان ماتخافش عليهم ... على الرغم ان اهليهم بيكونوا هناك

ثالثا : احلى حاجة فى الثورة او الانتفاضة الشعبية اللى حصلت دى ان شعب مصر كلة بيشتغل و مافيش حد مابيشتغلش .. كلة بيخلص شغلة و بينزل على ميدان التحرير و دا معنا ان عجلة النتاج المفروض تكون شغالة مش زى 25 يناير

رابعا : صورة كربون بتحدث من ايام 28 يناير تماما بتحصل دلوقتى , ودا معنا ان مافيش مصالحة تمت ما بين الشعب و الشرطة .. بالعكس الموضوع بيزيد اقوى من الاول و بشراسة و بيزداد كرة الشعب للشرطة اكتر من الاول

خامسا : اعداد المتظاهرين اكتر بكتير من ايام يناير خاصة بعد الساعة 5 مساء بعد الموظفين ما تخلص شغلها ...

سادسا : دا بيبن لك ان فية ناس كتير فهمت فى السياسة و عرفت ان فية اشياء كتير غلط ولازم مانسكتش عليها ...

سابعا : حتى هذة اللحظة بيتكرر سيناريو ثورة يناير بالضبط ... ودا معنا ان فى الاخر الشعب هو اللى هايكسب المعركة .. لأن فى النهاية المعركة اللى بيقودها الحق دائما تصل الى الحق و الاتتجاة السليم

............................................................................

تعالى نفكر لية حداث 25 يناير حصلت ولية احداث 19 نوفمبر حصلت  ؟؟؟؟؟؟؟

25 يناير : الفساد كتير و بهدله و تزوير رسمى فى الأنتخابات لحصول الحزب الوطنى على معظم المقاعد الموجودة فى البرلمان .. غير غلاء المعيشة  و تدهور البلاد و زيادة الدين و مسخرة من الشرطة فى كل انحاء الجمهورية .. هو دا اللى خلى مصر كلها تقوم و تنتفض و شعورها ان فية دمار بيحصل بسبب ( الفتة اللى عايم فيها ولاد الرئيس و الرئيس و اصحاب و قرايب  ) ...

يوم 25 يناير بدأ بأعصام فى ميدان التحرير و كان فية مسخرة من الشرطة فى فض الاعتصام ليلا بالضرب و البهدلة و قلة الادب اللى كل مصر متعودة عليها ... (كان يوم الثلاثاء ) و أجازة عيد الشرطة اللى كان عيد للشرطة  ساعتها ... وبعدها يوم 26 و 27 كان يوم الاعتقالات الشامل ... كان اى حد بيزور الميدان بس كان الشرطة بتعتقلة .... و جه يوم الغضب الشعبى 28 يناير اللى انقطعت فية شبكات الاتصال المحمولة و الانترنت  .. وكانت خبطة كبيرة جدا .... و جة مع الحكومة بالعكس ... عشان هما كانوا فاكرين بالاتصالات الناس هاتزيد لكن مع انقطاع التصالات الناس زادت اكتر عشان كل واحد عاوز يتطمن على اهلة اللى موجودين فى الشارع ..اصبحت مصر كلها فى الشارع رغم انف اى حد ... و بدأت المناواشات الغاشمة من الحكومة و عدم سيطرتها على الاوضاع حتى انسحبوا كالفئران الى الجحور ... ودا بلا مبالغة حصل و حدث ..

( فتح السجون , انفلات امنى , ضرب من كل ناحية , اثارة للشغب , سرقات ) .. كل دى حدوته عملها الحزب الوطنى الغاشم عشان يسيطر على الوضع الفالت و لكن بالجان الشعبية وقفت كل حاجة و شعب مصر القوى الفولازى ...

و بعدها بدأت التنازلات اللى ماحسناش انها هاتغير من الوضع شئ لحد ماجة خطاب 3 فبراير اللى تسبب فى موقع الجمل ... قال عشان متعاطفين مع الرئيس يرموا نفسهم  فى ورطة موقعة الجمل .... ودا اللى خلى كل الشعب يثار بعد ان كان متعاطف و ازدادت دولة التحرير قوة و قسوة على الفساد .... و بدأت نازلات اخرى لكن الشعب ماعندوش غير كلمة واحدة لها صدى السحر فى اجواء مصر و هى ارحل ارحـــــــــــــــــــل ... حتى ذهب مع الريح .

يوم 19 نوفمبر يوم اعتصام مصابين 28 يناير ... الحلقة المفقودة ان الاعصام دا كان سلمى و مش معطل الطريق لحد ما حصل و اللى شافتة مصر كلها من اعتداء على المعتصمين الوجودين و بدأت الشرارة اللى ولعت النار و الناس بالمناظر اللى كانت موجودة ... حتى هذة اللحظة يحدث الموت فى شارع القبضة الحديدية  ( قصدى محمد محمود باشا ) اسوأ وزير داخلية على مستوى مصر بأكملها ... لكن زى ما قلت اللى بيراهن ضد الشعب لاوم يعرف انة خسران ... انا شفت الميدان لما اتملئ بطريقة غريبة ... انا كنت فى الميدان اشعر مابين الدموع و الفرحة من قوة الشعب اللى مابيهموش اى حاجة غير ان تكون لية كرامة فى وسط الناس ... و كل شعب مصر نزل و اللى قادر ينزل عاوز ينزل و اللى مش عاوز ينزل يبقى بيتفرج على التلفزيون المصرى

( الدروس المستفادة اللى ماكررهاش المجلس العسكرى و حصلت فى 25 يناير )

اولا : عدم قطع الاتصالات . عشان الاعداد ماتزيدش

ثانيا : حرص على عدم نزول بلطجية بكثافة (بس دا مينعش ان فية بلطجية  )

ثالثا : عدم فتح السجون

.....................................................................

الكربون اللى فى الثورة بقى

خطاب مبارك جة متأخر ..................خطاب المشير اتأخر بردوا

اعتصام فى التحرير ......................اعتصام فى التحرير بكثرة

شهداء ...................................................................شهداء

نفاق التلفزيون المصرى ................................نفاق التليفزيون المصرى

محمد منير عمل غنوة ............محمد منير عمل غنوة بس كان عاوز يشتم فيها

الشرطة وسخة.......................الشرطة اوسخ و معاها عناصر من الجيش

.................................................................................

قال استفتاء شعبى قال ... يعنى واحد متجوز واحدة عرفى يروح يطلقها عند المأذون ؟

بجد بيصعب عليا اللى بقع تحت ضرس المصريين بجد بيتفرم .... بس فى كل الحالات الشعب عندة حق فى حاجات كتير

و بـــــــــــــــــــــــــــــس

لا تخبروا أمى

: ألو !!

: ايوة يا احمد انت فين ؟ 

:  انا فى التحرير يا بابا 

: انا مش قلت لك ما تروحش ...طب ربنا معاك سلام

دا كانت مكالمتى مع ابويا امبارح و انا فى ميدان التحرير .. من ساعة احداث 19 نوفمبر و انا على طول هناك .. بس كنت بخبى عن اهلى لكن امبارح بس صارحت ابويا بالموضوع . و انا عارف ان مش انا بس اللى بيحصل معاة نفس الموقف دا .. بيوت كتير و بيكونوا مسؤلين عن نفسهم لكن اهلم بيخافوا عليهم جدا .. المكالمة دى كانت جنب واحد ما أعرفهوش لكن حس انى خايف ارد على التليفون فقال لى : قول لأهلك الحقيقة انت مش بتعمل حاجة غلط .. و بالفعل قلت لأبويا انى فى التحرير .

كل يوم فى حياتى ليه بصمة فى دماغى إلا يوم امبارح كان يوم صعب جدا جـــــدا و اتسطــــــر فى دماغى بحروف من دهب 

انا شاهد عيان من ميدان التحرير ليوم 22 نوفمبر .. و الله العظيم دا اللى حصل .

وصلت التحرير من ناحية القصر العينى مع مسيرة جاية من المنيل ناحية شغلى انا و 3 زمايلى .. قبل ما ندخل التحرير عيونا بدأت تدمع و حسيت بصدرى مقفول و حسينا كلنا ان احنا عاوزين ندخل الحمام فى نفس واحد ازاى . ؟ مش عارف الشعور الغريب اللى يجيلنا مرة واحدة دا .... ارتحنا قدام المجمع شوية و بعد كدا قررنا ان ندخل شارع محمد محمود

 ... بصراحة انا وصلت لحد هارديز و ماعرفتش اكمل لحد جوه .. من كتر الناس و من كتر الدخان .. لكن كان فية ناس قايمة بالواجب اكتر منى و كتير و فى نفس الوقت فية سيارات اسعاف كتير ... والله كتــــــــــير جدا داخلة و خارجة من الشارع ..فبلاش احس ان احنا موقفين العمل بتاعهم ... و دخلت المترو من ناحية هارديز لاقيت ناس نايمة على الارض و تعبانة و ناس فى حاجة بيضا على وشها .. بس كتـــــير وقفت تحت مستنى صحبى و كانت الشبكة زفت و انا كان معايا (فودافون و موبينيل ) زبالة مافيش شبكة كويسة خالص     

لاقيت تليفونى بيرن و كلمت صحبى و قابلتة ورحنا على المجمع .. فى مكان خيمة اسمها 30 فبراير .. و الله عيال محترمة و كويسة جدا و كنت بهرج معاهم و بقول لهم يا عملاء يا مأجورين 

شويــة و جالنا شاب من الشباب الصغير (ناشئ) انا ما سألتهوش على اسمة اكتر ما سألتة الأصابة اللى فى رجلة سببها اية ؟ 

قال لى : ان العساكر داسوا على رجلة بالبيادة ... و كسروها و فكيت الجبس بس لاقيت رجلى بتوجعنى فالدكتور عملى جبس تانى .. واحد صحبى سألة انت ايه اللى جابك هنا  ؟قال عشان (مالــك) .

     : مالك مين ؟ 

     : واحد استشهد هنا فى الشارع بتاع محمد محمود .

     : تعرفوا ؟ .

     : لأ بس دا صاحب واحد صاحبى من الألتــــراس . 

و دا حالة و حال شباب كتير فى الميدان ....

وبعدها قررنا ان احنا نمشى من الميدان بس حصلت مفاجأة كل الميدان حس بيها ... حروق فى الوجهه والعين , كحة كتير 

مش انا و بس دا الميدان كله ... على الرغم من التعب مكانش فى غير رد واحد يردوا الثوار علية بنفس واحد .... ارحــــــــــــل .. ارحـــــــــــــــــــــــــل.

انتخبونى رمز الخابور !!!

دار حوار بينى وبين صاحبى مالوش فى السياسة

قال : هو فية انتخابات فى البلد ؟

قلت : صباح الفل انت نايم ولا اية ؟

قال : اصل ماليش فية

قلت : مالكش فية ازاى يا ابنى مش البلد دى بلدك  بردوا ؟

قال : يعنى هما هايعملوا اية .؟ ماخربوها خلاص و هاتتخرب تانى

قلت : اية رأيك لو مارحتش هاتدفع غرامة 500 جنية

قال : ينهار اسود انا لازم اروح

قلت : طب هاتنتخب مين ؟؟

قال : ياعم اى حد دى 500 ياعم و التعويرة فى الوش مافيهاش معلش

للأسف حال صابى دا حال كتير من المصريين انه هايورح ينتخب عشان فية غرامة علية لكن مش عشان العضو اللى انا هأنتخبة هايكون بمثابة صوتى فى البرلمان اللى بيطلع الدستور و القوانين اللى مفروض هانعيش عليها سنين عمرنا كلنا و اولادنا بعدينا

القلق مش من دا وبس .. القلق الكبير جاى من الاحزاب اللى ماكنتش موجودة او كانت محظورة ايام النظام القديم و عاوزين ( احتلال ) للبرلمان بشغف و كأن يأجوج و مأجوج خرجوا من حبسهم كى يقضوا على الاخضر و اليابس و تصبح البلاد سواد ...

انا ما أقصدش حزب بعينة لكن فية مخاوف كتير و رعب من الاخوان المتمثلين فى حزب الحرية و العدالة رمز الميزان و السلفيين المتمثلين فى حزب النور رمز الفانوس و الحرب المشتعلة بينهم .. يحملون راية الاسلام و مع ذلك فية خلافات مابينهم كتير و بجد ربنا يستر .. عشان لو قامت معركة مابينهم احنا اللى هانتظلم جامد .. لأن مع كل نفجار نووى الشعب هو اللى بيكون محكوم علية بالموت و دا نفس التشبية اللى بشبة بية القنبلتين الموجودين فى الساحة (الاخوان) المتمثل فى القنبلة الهيدروجينية و (السلفيين) المتمثل فى القنبلة النووية ...

على النقيض لو كانوا الأتنين فى اتجاة واحد و هو مصلحه  البلد

الخوف ان الانتخابتات كون زى صكوك الغفران ...(يعنى لو رشحتنا هاتدخل الجنة و لو مارشحتناش هاتروح النار ) و دى بقى المصيبة انك بقيت مابين اختيارين اصعب من بعض يا دينك او يا بلدك و دا هيعمل نار مع النفس و هايخليها تولع و خصوصا ان الدين تدخل بعمق

عمر ما اى حد يكرة ان الفساد بـ(الخمور , الدعارة , الرشاوى , السرقة , العتداء و الاغتصاب .......) يختفى من البلد و لو اتنفذ شرع الله بحق اكيد مش هايكون فية اى شئ من الأشياء دى موجودة ...بـــــــــــس هل تضمن ان الاشياء دى هاتختفى بجد كون ان السلطة اصبحت دينية ؟ و لا هاتصبح دولة مغلقة عن نفسها دون اى شئ سوى ان تحولت فقط من حكم الى حكم أخر ؟ ؟؟؟

الدين مش انغلاق عن النفس و خاصة ديننا الحنيف الاسلامى بالعكس دا انفتاح الى ابعد الحدود فى العلم و المعرفة و الاقتصاد و السياسة الدنياوية و قوة ....بـــــــــــــس هل الـ(ميزان) او (الفانوس) هيحققوا المعادلة دى ...؟ ولا كل ما يهمنا ان نلبس جلاليب و نمنع الأنترنت و التليفزيون و.... و... زى ما كنا بنسمع عنة فى الافلام اللى شوهت دينا و خليتنا نكره كل واحد مربى ذقنة ؟؟؟؟

دا من ناحية الدين اما من ناحية الاحزاب الاخرى زى اليبراليين مثلا فهل بنجاحهم فى الانتخابات فمصر وصلت لدرجات الفسوق و الاباحية و العرى و الخمور و .....و .... ؟ ما طب على كدا انا ارشح الدين احسن ... لكن هل الكلام بتاع العرى و الاباحية دا مظبوط ؟؟؟؟

اما الفلـــــــــــــــــــــول ... فأعذرونى ( اشخاص لا يوجد لديهم دماء فى العروق و لكن سائل ابيض لزج كالصراصير ...) يعن انت عندك دم اوى عشان تنزل الانتخابات و انت كنت عملت اية بروح مامتك قبل كدا ؟؟؟ ما انت السبب بوجودك فى حزب عارف ان كلة قوادين و مبهدلين الشعب ولا كنت هاتقول ما كنتش اعرف !! تبقى انت عامل زى الاطرش فى الزفة و دا بصراحة ماينفعش يمثلنى فى المجلس و لا حتى فى اى مجاملة دا عامل بالضبط زى خيال المآتة بتاع الغيط ولا بيهش ولا بينش .....

مش بشتمك يا فلـــــــــــول عشان فية حقد من ناحيتك طب مكان عندك المجلس عملت اية يا روح طنط ؟؟

اما العسكــــــر عسكر ففكك منى و انسانى

 ( شمعة تحترق من اجل الاخرين ) كلمة بتتقال كتير لكنها ما بتتنفذش منها اى حاجة , سمعنها كتير و كتير لكن بدون تنفيذ !!

فاكسان TV !!!!

مهمة اى تليفزيون فى الدنيا انة يقول الحقيقة و يبينها للناس لكن عندنا التليفزيون المصري من افضل المضللين للحقيقة و مش كدا وبس دا بيوسع دائرة الفتنة زى مثلا اللى حصل فى ماسبيرو

انهاردة كان يوم جميل بس الواحد بيضايق جدا من الكلام اللى بيقولة التليفزيون المصرى ان احنا عاوزين نخرب البلد و عاوزين نخلى البلد فى خبر كان ..... مش معقول طبعا انى يوم اجازتى اللى انا المفروض استريح فية او اقعد مع اهل بيتى و انزل اضيعة فى الميدان و فى الاخر تقول عليا انى مخرب ...

بسألنى انت بتنزل لية ؟ اقولك لية .. عشان اهل بيتى يعيشوا فى البلد دى كويس عشان ولادى , عشان نحس ان فية كرامة مش بالاسم بس  ... عشان كدا انا نزلت .

و الجميل جدا لما يجيبوا لواء فى التليفزيون و يقول ان احنا عملاء من آيران .....!!! كلام هايتم الندم علية فى الاخر زى ما اتهم اللواء الروينى 6 ابريل بالعمالة و طلعوا على التليفزيون امبارح برئوها من التهمة دى .

احب اقول للواء حسام ...يا سيادة اللواء اللى فى التحرير انهاردة مش من آيران .. خاصة انا ..انا جاى من كوكب تانى بس قررت انى اكون مصــــــــــــــــــرى

جمعة تسليم السلطة 18 نوفمبر

لحد دلوقتى و انا مستنى بيان المجلس العسكرى اللى هايقول فية للناس اللى فى التحرير امنوا المداخل و المخارج و احنا مالناش دعوة بيكم و عيشوا بقى مع نفسيكم ......و لحد دلوقتى البيان بتاعهم او الرسائل بتاعتهم ما أتقالتش ... جمعة 18 نوفمبر جمعة قلق كبير و مخاوف كتير فى كل بيت من شعب مصر....وكله خايف لتكون بلدنا زى ما حصل فى يوم 28 يناير ... ممكن الكلام دا يحصل بالفعل لو انضربت اول رصاصة من المجلس العسكرى و ساعتها هايتكرر موضوع الشرطة لكن المرة دى مع الجيش ...طبعا الجيش مش هايسكت و يحصل فية انشقاق و ساعتها يا نكون ليبيا تانية او سوريا تانية ... و  كنا فى يوم بنقول فية يا حيطة دارينا تبقى حرب مؤلمة و دمار و خراب ... ياعم بقولك اية ما تقلقش من حاجة احنا رايحيين نقول رأينا وراجعين تانى بيوتنا ...
بس تخيل لو الجيش ضرب نار ؟؟؟؟ اكيد فيه ناس هاتموت و هاتستشهد كتير ... طب نعمل اية ؟
ياعم مش هايحصل حاجة ..... ولا يحصل اية المشكلة ... ياعم ياكش تولع ....تولع اية ياعم ما احنا فيها .... ثم اية تولع هو احنا فى بوتاجاز ؟؟؟؟ 
كل اللى اقدر اقول له انى خرفت خلاص من البلد 
تصبحوا على خـــــــــــــــــــــــــــــير

عندما تكون الحرية فن عارى !!!

تخيل تكون عريان على المدونة بتاعتك او اى صفحة تواصل اجتماعى عشان تبين الحرية  بتاعتك  .!!! شئ مقرف مش كدا ؟؟ دا بالضبط اللى عملتة واحدة بتقول على نفسها ثائرة اسمها علياء مهدى فى مدونة سخيفة  اسمها ( مذكرات ثائرة ) .. فإن كانت الحرية هى ان الواحد يكون عارى فأنا ارفض هذة الحرية ..

يا اصدقائى الحرية ليها قيود بدون ان يتأذى احد .. يعنى ينفع اقف عريان فى المدونة بتاعتى عشان اعبر عن حريتى ؟ ما انا ممكن اعبر عن الحرية بأى طريقة مؤدبة و ترضى دينى و الدنيا و الناس اللى عايشة ...

لما عاوزين نوسع فكرنا يبقى تكون الحياة عارية ؟ لما نفكر ان نتحرر من القيود يبقى الحياة عارية ؟ .. اللى حصل فى المدونة دا ينبئ بوصول انحدار اخلاقى و ليس حرية  

عندما تكون الحرية فن عارى ... هو دا اللى احنا عاوزينة من الحرية  ؟ طب ما هو النظام السابق مكانش بيمنع اى حد انة يتعرى !! يعنى هو انت كنتى محتاجة لثورة عشان تتعرى ..؟

اللى مضايقنى حاجة واحدة ان المدونة بتاعتها كل ثانية بيشوفوها 3 اما انا مدونتى لحد دلوقتى من ساعة ما اتعملت ما شفهاش 500 على بعض ..

 بس دا بعدكم انى اظهر عريــــــــــــــــــــــــــــان 

لو كنت زعيم !!!

لو كنت رئيس او كنت قائد فريق او كابتن او مدرب اوى اى شئ و و لاقيت ان الفريق بتاعك ساخط عليك يبقى اكيد العيب فيك انت ولازم تشوف لك حل فيك عشان ماحدش يكرهك ... انت لو كنت مدير او مدرب او رئيس فى مصلحة سواء ان كانت حكومية او خاصة و لاقيت نوع من انواع السخط فممكن تغير فريقك او موظفينك لكن لو كنت رئيس جمهورية عمرك ما هتقدر تغير شعبك و لو كنت عضو مجلس شعب عمرك كمان ما هتقدر تغير دائرتك ... يبقى لازم تعرف ان العيب فيك ولازم تغيرة

من اهم المبادئ اللى كل واحد لازم يعرفها عن القائد انة لازم يكون محبوب , و الحب دا بينبت بنبتة صغيرة لحد ما تكبرها .. ناس كتير كان اقتصاد بلدهم زى الزفت لكن كانوا واقفين جنب رئيسهم و قائدهم لأنة فوق انة رمز دا شئ بيعبر عن قبطان الدفة اللى هابنقذهم من الغرق

مش هانجيب اسامى حالية .. مش من خوفنا لأ لكن فى نظرة ابعدية انهم ممكن يغيروا من نفسهم عشان ينجدوا شعبهم لكن ممكن نقول اسامى من دفاتر قديمة من التاريخ كان شعبهم بيمجدهم حتى الموت و ناس تانية سخط عيلهم شعبهم و ضربوهم و قتلوهم ... دا شئ طبيعى لما شعب يشعر بالظلم و الفقر ...و  شايف رئيسة فى بزخ و اسراف شايفة ساكن فى قصر و حراس من حوالية و فلوس و موكب مهيب و هو مسكين بيتبهدل ..

عشان تكون محبوب من الناس لازم تكون معاهم تسلم عليهم , تكلمهم , تشد من عزيمتهم عشان تبنى قبيلتك او بلدك او منطقتك عمر الحب ماكان بالفلوس ... الحب بالمودة و الرحمة و المعاملة الحسنة ..

دينا الاسلامى الحنيف علمنا اصول الحب فى كل حاجة .. حب المؤمن لدينة , حب الزوج لزوجتة , حب الفلاح لأرضة , دينا دين السلام و الحب ... سيدنا عمر بن الخطاب حقق المعادلة اللى مافيش اى حد قادر يحققها لحد دلوقتى و هى شعبى يحبنى لكن يخشى بطشى .. عشان كدا كان بيمشى فى الاسواق دون حارس فالحارس هو الله ... ينام تحت الشجرة بدون حامى فالحامى هو الله .. كان بدخل كل البيوت و يأكل مع الفقرا مش عشان يصورة فى التليفزيون او عشان رياء ... عشان ابتغاء مرضات الله ... فين القائد دلوقتى اللى يعمل كل دا عشان ابتغاء مرضات الله ... لحد دلوقتى انا لسة ما شفتهوش و ماعرفش هأشوفه قبل ما اموت ولا لأ ..؟

لكن اللى بتمناه انه يجى بسرعه عشان نكون كلنا معاه تحت شعار الايمان

كنت بفكر ارشح نفسى للأنتخابات لكن خفت من شئ واحد لو نجحت ... انة هايكون عليا عاتق كبير جدا وسط الدائر بتاعتى ... ثم لازم يكون عندى حماس شيد للموضوع دا ... مش بحب موضوع كسبت شرف المحاولة ... لأ ( شرف المحاولة دا بيقولوة الفشلة عشان يداروا عن فشلهم ) و احنا مش شعب فاشل ... اذا كان ناس كتير فكرت بموضوع شرف المحاولة دا فدا فشل مسبق .. احنا لازم ندخل المنافسة عشان عارفين ان احنا قدها و نقدر نوصل لها مش داخلين على هامش المهرجان .. احنا لاوم نكون المهرجان نفسة .. بدون مقاطعة فية شعور بداخلى و بداخل كل مصرى بينبض بأمل ان فية قوة خفية هاتحقق لنا المسار الصحيح ... و تعالوا نشوف القائد و هو موضوعنا الاساسى ... لازم فى اول الامر انك تكون محبوب و الحب بيكون بذرة صغيرة بتزرعها وسط شعبك لحد ما تخليها شجرة و تحافظ عليها بالمياه و قص الحشائش الضارة اللى جنبها .. عشان تكون شجرة كبيرة يستظل بيها كا مسكين و فقير و عابر سبيل .. ان فعلت ؟ و صلت ان الناس بقت فى ظل حبك و جنى ثمارك ... ان اهملتها ... اصبحت النبتة صحراء جرداء بدون ظل و فى النهاية هتلاقى المساكين بيهجموا عليك اول شخص عشان هاتكون انت السبب فى عدم الحفاظ عليهم ...

ازرع نبتة من دلوقتى فى منطقتك عشان تكبر الشجرة و يتظل بيها كل شعبك .. مش لما تمسك سلطة تنسى الشجرة .. الشجرة دى زى ما هتوسع شعبتك هاتجنى ثمارها انت و شعبك يا زعيم ....

we are Avatar

سيبك من انة فيلم تحفة و رهيب فى تصاميمة و جماله ودهشتة ... كلنا متفقين على دا ..لكن اللى لازم نعرفة انة درس مهم جدا و فية نصائح كتيرة جدا ... كل اللى انا عاوزكم تعرفوة انة فيلم خيال علمى اه لكن فية نقط كتير مهمه 

اطلب منك دلوقتى تشغل خيالك 

لو افترضت ان اهل القبائل و العشيرة اللى بيتكلم عنها الفيلم هما العرب ... ( الحصان , القوس و السهم , القبائل , البدائية ....) بمعنى اصح زى ما شايفنا برة .... 

وطبعا جيش الدخلاء هما الامريكان .. اللى موجودين بالفعل فى الفيلم بالتقنيات و الاجهزة الحديثة و الجيوش 

لو افترضنا ان المعدن اللى عاوزينه من القبائل دى هوة البترول اللى عاوزاه امريكا من القبائل العربية و بيحاربوا عشان خاطرة 

تبقى كدا حطيت النقط على الحروف و اتفرج على الفيلم تانى ...هاتحس بجد ان الشعور اللى موجود جوة الفيلم بيصور لك الحقيقة الكاملة اللى احنا عايشنها دلوقتى اللى عملها (جيمس كاميرون ) فى الفيلم بتاعة ... 

الرسالة دى كانت متوجهه للأمريكان ( خلوا بالكم من غضب الشعوب و القبائل) 

يتمنى منك انك تتفرج على الفيلم تانى من رؤيه دى و قولى كلامى صح ولا لأ 

we are Avatar

عيد اضحى سعيد

دقت الساعة 6.37 معلنة عن صلاة العيد ..كل سنة وانتم طيبيين .. انهاردة روحت صليت فى الجامع اللى جنب بيتى على طول .. كالعادة زحمة جدا و الستات اكتر من الرجالة ..ودا شئ بيخوفنى كل سمة ..لية ؟ ..عشان خايف و انا مستعجل اخبط واحدة او ازق واحدة منم غير قصد ..عشان كدا بحاول امشى على قشر بيض لحد ما اوصل مكان فية الرجالة عشان اروح الصلى معاهم ... لكن سبحان الله المكان بتاع الرجالة بيعيد و عمال بيبعد اكتر و الستات مغرقة الشارع ..... فى اللحظة دى من كل سنة بحس ان القيامة فاضلها ساعات قليلة بجد .. 

انا عمرى ما حسيت بالعيد غير لما اصلى العيد ... و الفرق عندى بين العيد الاضحى و الفطر كبير جدا ....دا عيد الكحك اللى امى بتعملة و دا عيد الخروف اللى ابويا بيجيبة كل سنة (ربنا يخليهملى )  كل سنة وانتم طيبيين كلكم 

بعد نظر !!!

افتكروا كويس الكلام اللى هاقولة كويس و يمكن فى الايام اللى جاية تثبت ان كلامى غلط  او انة صح 100% ..

اولا : الاخوان المسلمون هايكون ليهم نصيب الاسد فى البرلمان

ثانيا : المرشح لجمهورية مصر العربية هايكون من الاسلاميين .. سواء ان كان من السلفيين او الاخوان

ثالثا : مصر هايكون ليها شأن كبير جدا فى الرياضة خاصة العاب المنازلات

رابعا : عداء كبير بينا وبين دول محيطة اوى مثل اسرائيل ( هى العداوة موجودة بس هاتزيد بمراحل كبيرة  )

خامسا : مصر هاتكون دولة منظمة نسبيا و اقتصادها هايبدأ يزيد

سادسا : زيادة عددد المنافقين فى البلد بشكل غير عادى حخاصة لما المسلمين يمسكوا حكم مصر

سابعا : مصر هاتنضف من حاجات وسخة كانت فيها كتير

ثامنا : المجلس العسكرى مش هايدى صلاحيات كتير للبرلمان زى ما بيقول ناة هايسلم السلطة مدنيا

على فكرة انا مش مع الاخوان ولا السلفيين بس انا عندى شعور كبير جدا بنجاحهم فى الانتخابات .. مصر مش قاهرة وجيزة بس مصر محافظات كتير ... و  المحافظات دى الاخوان منظمين فيها بشكل كويس ..

لكن ارجع و اقول انى مش هأرشح غير اللى يستاهل انة يمثلنى كشخصى فى مجلس الشعب ..و ياريت انتم كمان تحاولوا تعملوا اللى انا بفكر فية ....

اخوان , سلفيين , ليبرالين , مسيحيين , كتلة مصرية .....المهم يكون كويس و يستاهل

المهم نكون مصريين ......................ايد واحدة بجد 

مبادئ فوق سريرية

مصطلحات تخلينا نشد فى شعرنا ...فوق دستورية , ليبرالية , سلفيين , القباط المهجر , فلول , ...مصطلحات حتى لو حصل اية عمرنا ما هانسمع عنها ابدا .. الحاجة الوحيدة اللى كنت بسمع عنها قبل الثورة الاخوان و حركة كفاية و حبة طراطيش عن 6 ابريل .... دلوقتى احزاب كتير و حركات اكتر و كل واحد حزقاة كلمة فى زورة عاوز يقولها يقوم عاملة حركة او حزب .... مصر اتفككت من غير ما ناخد بالنا ... لازم نوصل لأتجاة واحد ... هو ان كلنا نكون مع بعض و نساعد بعض .. هى للأسف طبيعة فينا لكن مش بنحققها ... 
زى ما سمعنا عن مبادئ فى دستورية .... كفاية مصطلحات دون اعمال ... بيفكرونى بعنوان مسرحية شكسبير ...(جعجعه بلا طحن )  طب يا جماعة عاوزين دم و الناس علينا تتلم ... بقول لكم زى ما فية كنبة ... بقى دلوقتى فية مبادئ فوق سريرية...تصبحوا على خير